نصائح هامة تجعلك اكثر صحة فى رمضان

طبعا رمضان شهر الخير والبركة والحسنات؛ لكن ده ما يمنعش إن بعضنا بيكون قلقان من تأثير الصيام على الصحة والوزن ونضارة بشرة، وده طبعا بيكون مرعب للسيدات بشكل أكبر؛ بخاصة إن رمضان السنة دي في الصيف، ودرجة الحرارة عالية جدا، وده بالتأكيد هيأثر على البشرة.

وعلشان نحافظ على صحتنا ونضارة بشرتنا في رمضان لازم نحافظ على التوازن في أكلنا، ونعوّض الميه اللي بيفقدها الجسم طوال ساعات الصيام، وده بإننا نتّبع النصايح اللي أوصى بها أطباء التغذية وخبراء العناية بالبشرة؛ هي:

1- الاهتمام بتناول طبق السلطة
السلطة من الأطباق اللي لازم تكون موجودة على السفرة في أي وقت؛ بخاصة مع الصيام؛ لأنها بتزوّد الجسم بكميات كبيرة من الفيتامينات والمعادن والألياف الغذائية، وكمان فيتامين (أ) واللي بيكون موجود في خضراوات زي الجزر والخس؛ وده بيساعد في الحفاظ على ترطيب البشرة، وبيعمل على عدم إصابتها بالجفاف.

وكمان تناول الخضراوات الطازجة اللي بتكون موجودة في السلطة في أول الفطار بيهيّأ المعدة والجسم إنه يستقبل باقي الأكل، وكمان بيقلل من كميات الأكل اللي بناكلها على الفطار.

2- تقسيم وجبة الفطار على مرتين
أفضل نظام غذائي ممكن نمشي عليه في رمضان إننا نقسّم وجبة الفطار على مرتين؛ يعني على الفطار ناكل طبق السلطة مع الشوربة وأي حاجة خفيفة، وبعد صلاة العشاء والتراويح ناخد وجبة تانية.

3- اختيار الطرق الصحية للطهي
معظم ستات البيوت في شهر رمضان بتحب تعمل الأكل المحمّر؛ لكن خبراء التغذية بينصحوا إنه علشان أكلنا يكون صحي ونحافظ على معدتنا؛ بخاصة في شهر رمضان لازم نقلل من تناول الأكل المقلي في الزيت، ونستخدم طرق تانية في الطبخ زي إننا نسلق الأكل أو نحطه في الفرن أو نسوّيه على البخار؛ يعني مثلا بدل ما نعمل سمك مقلي ممكن نعمله صينية في الفرن، ودي بتكون طعمها لذيذ ومفيدة جدا، ونقدر كمان نشويه أو حتى نعمله مسلوق.

4- تقليل الملح في الأكل
لازم نحاول على أد ما نقدر إننا نقلل من كمية الملح في أكلنا؛ لأن زيادة كميته في الأكل ممكن تسبب ارتفاع في ضغط الدم، وخلل في توزيع السوائل في الجسم.

5- الاهتمام بتناول منتجات الألبان
لازم نهتم بشرب اللبن جدا سواء مع الفطار أو على السحور، وكمان منتجات الألبان التانية زي الجبنة والزبادي؛ لأن لهم فوايد كتيرة جدا للجسم.

6- تأخير وجبة السحور
من الأفضل إننا نأخّر وجبة السحور لغاية قبل ميعاد الإمساك زي ما أمرنا رسولنا الكريم صلى الله عليه وسلم؛ لأن ده هيخلينا نحتفظ بطاقة وجبة السحور لباقي اليوم.

ولازم وجبة السحور تكون خفيفة، وتكون بتحتوي على ألياف غذائية زي اللي موجودة في الخضار الطازة، وكمان تكون بتحتوي على البروتين زي اللي موجود في البيض.

7- تناول الفواكه المجففة
الفاكهة المجففة بتحتوي على نسبة عالية من مضادات الأكسدة، ودي اللي بتحافظ على نضارة وحيوية البشرة لفترات طويلة، بالإضافة إلى إنها بتعوّضنا عن بعض الأكلات وبتخلّص الجسم من السموم.

التصنيف :